• +998 71 244 69 32
  • This email address is being protected from spambots. You need JavaScript enabled to view it.

yonma yon 2

O‘zbekiston Respublikasi Din ishlari bo‘yicha qo‘mitasi huzuridagiDiniy-ma’rifiy sohada malaka oshirish va qayta tayyorlash instituti
Normativ-huquqiy hujjat

Vazirlar Mahkamasining 542-son qarori

Din ishlari bo‘yicha qo‘mita huzuridagi Diniy-ma’rifiy sohada malaka oshirish va qayta tayyorlash instituti faoliyatini tashkil etish chora-tadbirlari to‘g‘risida

27-avgust 2025-yil542-sonKuchga kirgan: 28-avgust 2025-yil

Qaror haqida

Qaror institutning faoliyati, tuzilmasi va diniy-ma’rifiy soha mutaxassislarini qayta tayyorlash hamda malakasini oshirish tartibiga doir asoslarni belgilaydi. Institut Din ishlari bo‘yicha qo‘mita huzurida faoliyat yuritadi.

Asosiy yo‘nalishlar

Malaka oshirish

Diniy-ma’rifiy soha xodimlari va islomshunoslik hamda dinshunoslik o‘qituvchilari uchun o‘quv kurslarini tashkil etish.

Qayta tayyorlash

Soha ehtiyojlariga muvofiq pedagog kadrlar va mutaxassislarni qayta tayyorlash tartibini belgilash.

Ilmiy faoliyat

Dolzarb masalalar bo‘yicha tadqiqotlar, zamonaviy ta’lim usullari va xalqaro hamkorlikni rivojlantirish.

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Din ishlari boʻyicha qoʻmitasi huzuridagi Diniy-maʼrifiy sohada malaka oshirish va qayta tayyorlash instituti faoliyatini tashkil etish chora-tadbirlari toʻgʻrisida

Oʻzbekiston Respublikasi Prezidentining “Fuqarolarning vijdon erkinligi huquqi kafolatlarini yanada mustahkamlash hamda diniy-maʼrifiy sohadagi islohotlarni yangi bosqichga olib chiqish chora-tadbirlari toʻgʻrisida” 2025-yil 21-apreldagi PF-68-son Farmoni ijrosini taʼminlash, shuningdek, diniy sohada mutaxassislarning malakasini oshirish va qayta tayyorlash ishlarini yangi bosqichga olib chiqish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2025-yil 21-apreldagi PF-68-son Farmoniga muvofiq:

Oʻzbekiston xalqaro islom akademiyasi huzuridagi Malaka oshirish markazi Oʻzbekiston Respublikasi Din ishlari boʻyicha qoʻmitasi huzuridagi Diniy-maʼrifiy sohada malaka oshirish va qayta tayyorlash instituti etib (keyingi oʻrinlarda — Institut) qayta tashkil etilgani;

Institut islomshunoslik, dinshunoslik, davlat va din munosabatlari asoslari, shuningdek, radikallashuvning oldini olish yoʻnalishlarida diniy sohada mutaxassislarning malakasini oshirish va qayta tayyorlashga yagona masʼul muassasa etib belgilangani maʼlumot uchun qabul qilinsin.

2. Quyidagilar Institutning asosiy vazifalari etib belgilansin:

diniy-maʼrifiy soha mutaxassislarini, mazkur sohada faoliyat yurituvchi davlat va nodavlat notijorat tashkilotlari xodimlarini, shu jumladan barcha taʼlim tashkilotlarining islomshunoslik va dinshunoslik fanlari oʻqituvchilarining malakasini oshirish va qayta tayyorlash;

islomshunoslik, dinshunoslik, davlat va din munosabatlari asoslari, shuningdek, radikallashuvning oldini olish yoʻnalishlarida diniy-maʼrifiy sohada mutaxassislarning malakasini oshirish va qayta tayyorlash;

normativ-huquqiy hujjatlarida belgilangan diniy-maʼrifiy soha xodimlari va rahbar kadrlarining malakasini oshirish va qayta tayyorlash;

tinglovchilar uchun ishdan ajralmagan holda malaka oshirishning muqobil shakllarini joriy etish, kadrlar salohiyatini oshirish, taʼlim berish jarayonida innovatsion pedagogik texnologiyalar asosida oʻqitishni tashkil etish;

diniy-maʼrifiy sohada faoliyat yurituvchi davlat xizmatchilari hamda fuqarolik jamiyati institutlari vakillari uchun soha boʻyicha bilimlarini oshirishga qaratilgan oʻquv kurslarini tashkil qilish;

ilmiy-tadqiqot muassasalari bilan hamkorlikda diniy-maʼrifiy sohadagi muammolar va mazkur sohaning eng dolzarb masalalari, radikallashuvga, ekstremizmga va terrorizmga qarshi kurashish boʻyicha ilmiy-tadqiqot loyihalarini amalga oshirish, ushbu jarayonga milliy, xorijiy va xalqaro grantlarni jalb qilish;

taʼlim jarayoni hamda ilmiy faoliyatga yuqori malakali mahalliy va chet ellik mutaxassislarni keng jalb qilish, pedagogika sohasida ilgʻor tajriba almashish borasida xalqaro hamkorlikni yoʻlga qoʻyish;

respublikada ijtimoiy-maʼnaviy muhitni yanada sogʻlomlashtirish, oʻsib kelayotgan yosh avlodni maʼnaviy-axloqiy jihatdan barkamol etib, vatanparvarlik ruhida tarbiyalash ishlarini tubdan yaxshilash boʻyicha doimiy ish olib borish;

ilmiy asoslangan, dinning asl taʼlimotini oʻzida mujassam etgan bilimlarni qamrab olgan oʻquv reja, oʻquv dastur, oʻquv qoʻllanmalari hamda taqdimot materiallarini ishlab chiqish.

3. Institut Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmatida ochiladigan shaxsiy gʻazna hisobvaraqlariga, bank hisobvaraqlariga, shu jumladan, xorijiy valyutadagi shaxsiy gʻazna hisobvaraqlariga ega boʻladi.

4. Belgilansinki:

a) Institutga Din ishlari boʻyicha qoʻmita raisi tomonidan lavozimga tayinlanadigan va lavozimdan ozod etiladigan direktor rahbarlik qiladi, uning maqomi, transport, mehnatga haq toʻlash, moddiy ragʻbatlantirish va tibbiy taʼminoti shartlari oliy taʼlim tashkiloti filiali direktoriga tenglashtiriladi;

b) Institutga:

ilmiy, taʼlim va qonunchilik hujjatlarida taqiqlanmagan boshqa faoliyatni amalga oshirish boʻyicha pullik xizmatlar koʻrsatish;

Din ishlari boʻyicha qoʻmita bilan kelishilgan holda shartnoma asosida oʻqitish qiymatlarini mustaqil belgilash;

Institutni rivojlantirish jamgʻarmasi mablagʻlarining hamda shartnoma asosida ishlarni bajarish va xizmat koʻrsatishdan tushadigan boshqa mablagʻlarning (ularni amalga oshirish uchun xarajatlarini chegirib tashlagan holda) 75 foizgacha qismini Institut xodimlarini ijtimoiy himoya qilish va moddiy ragʻbatlantirish tadbirlariga yoʻnaltirish;

oʻquv jarayoniga professor-oʻqituvchilarni hamda soha boʻyicha mutaxassislarni mehnatga soatbay haq toʻlagan holda toʻgʻridan-toʻgʻri shartnoma asosida jalb etish huquqi beriladi;

v) Oʻzbekiston xalqaro islom akademiyasi huzuridagi Malaka oshirish markazining Qoraqalpogʻiston Respublikasi va Surxondaryo viloyatlari mintaqaviy filiallarining faoliyati tugatiladi.

5. Quyidagilar:

Oʻzbekiston Respublikasi Din ishlari boʻyicha qoʻmitasi huzuridagi Diniy-maʼrifiy sohada malaka oshirish va qayta tayyorlash institutining tuzilmasi 1-ilovaga muvofiq;

Oʻzbekiston Respublikasi Din ishlari boʻyicha qoʻmitasi huzuridagi Diniy-maʼrifiy sohada malaka oshirish va qayta tayyorlash institutining Samarqand va Namangan mintaqaviy filiallari tuzilmasi 2-ilovaga muvofiq;

Oʻzbekiston Respublikasi Din ishlari boʻyicha qoʻmitasi huzuridagi Diniy-maʼrifiy sohada malaka oshirish va qayta tayyorlash institutida mutaxassislarni qayta tayyorlash hamda ularning malakasini oshirish tartibi toʻgʻrisidagi nizom 3-ilovaga muvofiq tasdiqlansin.

6. Belgilab qoʻyilsinki, Institutda 2025-yil 1-sentabrdan boshlab:

diniy-maʼrifiy soha mutaxassislari, mazkur sohada faoliyat yurituvchi davlat va nodavlat notijorat tashkilotlari xodimlari, mulkchilik shakli va idoraviy boʻysunuvidan qatʼi nazar barcha taʼlim tashkilotlarining islomshunoslik va dinshunoslik fanlari oʻqituvchilari ishga qabul qilingan davrdan boshlab olti oy ichida, keyinchalik har uch yilda bir marotaba oʻz malakasini oshiradi;

diniy-maʼrifiy sohada yaxlit ilmiy-tadqiqotlar tizimini yaratish maqsadida tegishli ixtisosliklar, shu jumladan, dinshunoslik, islomshunoslik sohalari boʻyicha oliy taʼlimdan keyingi taʼlim joriy etiladi;

Institut tadqiqotchilarini tadqiqot sohalari boʻyicha tashkilotlarga biriktirish amaliyoti joriy etiladi, ularning ilmiy-tadqiqot mavzulari biriktirilgan sohalarning aniq muammolarini hal etishga yoʻnaltiriladi;

taʼlim tashkilotlarining islomshunoslik, dinshunoslik, davlat va din munosabatlari asoslari fanlaridan dars beradigan, oliy maʼlumotga ega nomutaxassis pedagog kadrlari shartnoma (toʻlov) asosida qayta tayyorlash kurslarida oʻqitiladi.

7. Shunday tartib oʻrnatilsinki, unga muvofiq:

qayta tayyorlash kurslarini muvaffaqiyatli tugatgan taʼlim tashkilotlarining oliy maʼlumotga ega nomutaxassis pedagog kadrlariga davlat namunasidagi diplom beriladi hamda ular taʼlim tashkilotlarida islomshunoslik, dinshunoslik fanlaridan dars berish huquqiga ega boʻladi;

diniy-maʼrifiy soha mutaxassislari, mazkur sohada faoliyat yurituvchi davlat va nodavlat notijorat tashkilotlari xodimlari, mulkchilik shakli va idoraviy boʻysunuvidan qatʼi nazar barcha taʼlim tashkilotlarining islomshunoslik va dinshunoslik fanlari oʻqituvchilari Institutda islomshunoslik, dinshunoslik, davlat va din munosabatlari asoslari, shuningdek, radikallashuvning oldini olish yoʻnalishlarida malakasini oshirish bepul amalga oshiriladi;

Institutda manfaatdor vazirlik, idora va tashkilotlarning buyurtmasiga koʻra shartnoma (toʻlov) asosida malaka oshirish va qisqa muddatli oʻquv kurslari tashkil etiladi.

8. Institut faoliyatini moliyalashtirish:

Davlat budjeti mablagʻlari, Institutning budjetdan tashqari mablagʻlari, shartnoma (toʻlov) asosida oʻqitishdan tushadigan mablagʻlar, ilmiy-oʻquv, oʻquv-metodik, ilmiy va axborot-tahliliy mahsulotlarni ishlab chiqarish, xoʻjalik (mehmonxona) faoliyatidan va shartnoma asosida xizmat koʻrsatishdan tushadigan mablagʻlar, homiylik xayriyalari, xalqaro moliya institutlari va boshqa xorijiy tashkilotlarning grantlari, respublika ilmiy-tadqiqot loyihalari grantlari hamda qonunchilik hujjatlarida taqiqlanmagan boshqa manbalar hisobidan amalga oshiriladi;

2025-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Din ishlari boʻyicha qoʻmitaga ajratilgan mablagʻlar doirasida amalga oshiriladi, 2026-yildan boshlab esa Davlat budjeti parametrlarida nazarda tutiladi.

9. Din ishlari boʻyicha qoʻmita, Institut:

a) bir oy muddatda Institut ustavi tasdiqlanishi hamda belgilangan tartibda davlat roʻyxatidan oʻtkazilishini taʼminlasin;

b) ikki oy muddatda:

islomshunoslik, dinshunoslik, davlat va din munosabatlari asoslari, radikallashuvning oldini olish yoʻnalishlarida malaka oshirish va qayta tayyorlash boʻyicha Institutning yangi oʻquv reja va dasturlarini ishlab chiqsin;

Oliy taʼlim, fan va innovatsiyalar vazirligi bilan birgalikda oliy taʼlim tashkilotlarining dinshunoslik fanidan dars berayotgan nomutaxassis boʻlgan professor-oʻqituvchilari roʻyxatini shakllantirsin, roʻyxatni tizimli ravishda yangilab Institutning qayta tayyorlash kurslarida oʻqitilishni tashkil etsin;

v) Oʻzbekiston xalqaro islomshunoslik akademiyasi bilan birgalikda:

Institutni Oʻzbekiston xalqaro islomshunoslik akademiyasiga qarashli Toshkent shahri Shayxontohur tumani Abdulla Qodiriy koʻchasidagi 11a-uy manzilida joylashgan binoning birinchi qavatiga (469 kv metr hududiga) tekin foydalanish huquqi asosida joylashtirilishini taʼminlasin;

tugatilayotgan Qoraqalpogʻiston Respublikasi va Surxondaryo viloyati mintaqaviy filiallari xodimlarini ishga joylashtirsin.

10. Samarqand viloyati hokimligi va Namangan viloyati hokimligi Din ishlari boʻyicha qoʻmita bilan birgalikda bir oy muddatda Institutning Samarqand va Namangan mintaqaviy filiallarini oʻquv jarayonini tashkil etish uchun mos binolarga tekin foydalanish huquqi bilan joylashtirish choralarini koʻrsin.

11. Din ishlari boʻyicha qoʻmita manfaatdor vazirlik, idora va tashkilotlar bilan birgalikda:

Institutni strategik rivojlantirish, uning xalqaro nufuzini oshirish, taʼlim faoliyatini xalqaro standartlar darajasiga koʻtarish, ilmiy-pedagogik va moddiy-texnik salohiyatini kuchaytirish choralarini koʻrsin;

kadrlar malakasini oshirish va qayta tayyorlashning ilgʻor shakl va usullarini joriy etgan holda taʼlim dasturlarini doimiy takomillashtirib borsin;

Institut rahbarlari va professor-oʻqituvchilarini xorijiy davlatlarda oʻzaro tajriba almashish va malaka oshirishi uchun zarur shart-sharoitlar yaratsin, yetakchi xorijiy taʼlim va ilmiy-tadqiqot tashkilotlari bilan hamkorlik aloqalarini kengaytirsin.

12. Tashqi ishlar vazirligi yetakchi xorijiy ilmiy taʼlim markazlari va taʼlim tashkilotlari bilan hamkorlik qilishda Institutga har tomonlama koʻmaklashsin.

13. Vazirlar Mahkamasining “Oʻzbekiston xalqaro islom akademiyasi huzurida Malaka oshirish markazi va “Ziyo” media markazini tashkil etish hamda ularning faoliyatini qoʻllab-quvvatlash chora-tadbirlari toʻgʻrisida” 2019-yil 14-yanvardagi 25-son qaroriga 4-ilovaga muvofiq oʻzgartirishlar kiritilsin.

14. Din ishlari boʻyicha qoʻmita manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

15. Ushbu qarorning bajarilishini nazorat qilish Oʻzbekiston Respublikasi Din ishlari boʻyicha qoʻmitasi raisi S.D. Toshboyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 27-avgust,

542-son

(Qonunchilik maʼlumotlari milliy bazasi, 28.08.2025-y., 09/25/542/0785-son)