O’n bir Ahmad

O’zbekiston xalqaro islom akademiyasi huzuridagi Malaka oshirish markazi Namangan viloyati mintaqaviy filialida malaka oshirayotgan  IV davra tinglovchilarining darsdan keyingi bo’sh vaqtlarini mazmunli o’tkazish maqsadida Namangan shahrida joylashgan “O’n bir Ahmad” ziyoratgohiga tashrifi tashkillandi

2024 yil 24-yanvar kuni Oʼzbekiston xalqaro islom akademiyasi huzuridagi Malaka oshirish markazi Namangan viloyati mintaqaviy filialida malaka oshirayotgan IV davra tinglovchilarining darsdan keyingi bo’sh vaqtlarini mazmunli hamda samarali o’tkazish va ularni Namangan viloyatining boy tarixiy merosi bilan tanishtirish maqsadida “O’n bir Ahmad” ziyorotgoh majmuasiga sayohat amalga oshirildi.

Namangan shahridagi “O‘nbir Ahmad” ziyoratgohi haqida turli rivoyatlar bor. Ba’zilar, mazkur ziyoratgoh Islom olamining turli go‘shalarida va turli yillarda yashab o‘tgan o‘n bir Ahmadlar nomi bilan ataluvchi tasavvuf ilmining yirik namoyondalari bo‘lgan shayxlar hurmati uchun tiklangan ziyoratgoh deyishsa, ba’zilar fiqh va tasavvuf ahli vakili O‘n bir Ahmad hazratlarining qabrlari deyishadi.

Aytishlaricha O‘n bir Ahmad hazratlarining zoti shariflari payg‘ambarimiz Muhammad (s.a.v)ga borib taqalar ekan. Ul zotning qabri sobiq ittifoq mafkurasi zaminida „adashganlar“ tomonidan buzib yuborilgan edi. Mustaqilligimizning ilk yillarida O‘n bir Ahmadga bag‘ishlab hashar yo’li bilan yangi maqbara binosi qurildi.

Muxtaram prezidentimiz Sh.Mirziyoyev tashabbusi bilan 2018-yildan “O’n bir Ahmad” ziyorotgoh majmuasini qurish ishlari boshlandi. Qariyb bir gektar maydonda maqbara, 110 metrli sharqon uslubdagi ayvon, uchta shiypon, tahoratxona, namozxona. kutubxona va oshxonaga ega bo’lgan majmua 2021-yil to’liq qurib bitkazildi.

Shaharning Davlatobod tumani, Yuqori G‘irvon mahallasida joylashgan mazkur qadamjo mahalliy aholi tomonidan eng ko‘p ziyorat qilinadigan maskanlardan biri hisoblanadi.

Ziyorat asnosida o’tganlar ruhiga atab Qur’oni karim oyatlari tilovat qilindi hamda yurtimizda farovonlik va tinchlikni bardavom bo’lishini so’rab duoyi xayrlar qilindi.