Xoja Samandar Termiziy ziyoratgohiga sayohat.

2023-yil 19-iyun kuni O'zbekiston xalqaro islom akademiyasi huzuridagi Malaka oshirish markazining Surxondaryo viloyati mintaqaviy filiali 8-davra tinglovchilari uchun Surxondaryo viloyati Jarqoʻrgʻon tumani Surxon qishlogʻida joylashgan Xoja Samandar Termiziy ziyoratgoxiga tushdan keyingi tadbir rejasi asosida sayohat tashkil etildi.

Sayohat davomida Xoja Samandar Termiziy hayoti va ilmiy faoliyati haqida qiziqarli ma’lumotlar berildi.

“Dastur ul-muluk” (“Podshohlarga qo‘llanma”) nomli qimmatli asarning muallifi XVIII asr tarixchisi Xoja Samandar Termiziy bo‘lib, uning to‘g‘risidagi ma’lumotlar deyarli kam. U haqidagi ma’lumotlar asosan “Dastur ul-muluk”ning o‘zida, shuningdek muallifga zamondosh bo‘lgan mashhur shoirlardan Muhammad Ba’di ibn Muhammad Sharif Samarqandiy Malihning “Muzakkir ul-asxob” antologiyasida mavjud.

Muallifning haqiqiy ismi so‘nggi vaqtlargacha noma’lumligicha qolgan edi. “Dastur u-muluk” va Malihning “Muzakkir ul-asxob” asarlarida uning faqat taxallusi – Samandar ko‘rsatilgan edi. Bu taxallus unga uning tilining o‘tkirligi, o‘z ishiga jiddiy yondashganidan berilgan bo‘lishi kerak. Faqatgina “Muzakkir ul- asxob” asaridagina Xoja Samandarning asl ismi — Muhammad Baqo berilgan.

Muallif hayotining aniq sanasi hali to‘liq o‘rnatilmagan.

U uzoq umr ko‘rgan degan asoslar ham bor. Ayrim ma’lumotlarga ko‘ra, Xoja Samandar taxminan 1638-yil Termizda sayyidlar oilasida tavallud topgan bo‘lib, 1740-yilgacha Qumqo‘rg‘onda yashab o‘tgan. Buxoroda madrasa tahsilini olgan. Dastlab Narpayda qozilik qilgan (1660 – 1662-yillar). Hayotining birinchi yarmi sayohat qilib yurish bilan kechgan. Malih u haqida shunday yozadi: “U sharq va g‘arb shaharlari bo‘ylab sayohat qilib, taqdirning shirin va achchiq damlarini boshidan kechirgan”. Yana shunday asoslar ham borki, bu davrda muallif darveshona hayot tarzini ham boshidan kechirgan. Keyinchalik esa o‘z hayot tarzini o‘zgartirgan bo‘lishi mumkin.

Xoja Samandar uzoq vaqt Qarshi (Nasaf)da yashagan bo‘lishi kerak. Yo‘l- yo‘lakay shuni ham ta’kidlab o‘tish lozimki, muallifimiz to‘g‘risida yozayotgan Malih 1100/1688 – 89-yili uni Nasafiy deb ataydi. Bu yerda u ikki bor Qarshi raisi lavozimiga tayinlangan. Malihning so‘zlariga ko‘ra, u “rayosat panoh” faxriy unvoniga ega bo‘lgan.

1670-yillarda Buxoroga qaytib, Ashtarxoniylardan Abdulazizxon (1055 – 1091/1645 – 1680) saroyida tarixchi (voqeanavis) lavozimida ishlagan. U Abdulazizxonning Buxoroga kirib kelgan xorazmiylarga qarshi yurishida ishtirok etgan. Xoja Samandar Subhonqulixon (1091 – 1114/1680 – 1702) ning Balxga 1097/1685, 1104/1693 va 1107/1695-yillarda amalga oshirgan uchta yurishining ishtirokchisi bo‘lgan. Shuningdek, Xoja Samandar elchilik vazifasini ham amalga oshirgan. U Subhonqulixon tomonidan Samarqandning isyonkor hukmdori Xo‘jaquli bilan uni xon bilan yarashishga ko‘ndirish maqsadida muzokaralar olib borish uchun ikki marta vakil qilib yuborilgan edi. Bularning barchasi haqida muallifning shaxsan o‘zidan, uning Balxga 1107/1695-yilgi yurishida ishtirok etishi to‘g‘risida esa Xoja Samandarga zamondosh bo‘lmish Muhammad Amin ibn Muhammad Zamonning “Muhit at-tavorix” nomli tarixiy asaridan bilish mumkin.

Xoja Samandar Termiziy o‘z davrining keng ma’lumotli kishilari jumlasidan bo‘lgan. Malihning bergan ma’lumotlariga asosan, Xoja Samandar yetuk shoir, yozuvchi va tarixchi olim bo‘lgan, ilohiyot ilmini ham yaxshi bilgan, ko‘p sayohat qilib, nazariy bilimini mustahkamlagan. Uning adabiy faoliyati 1100/1688 – 89- yillarda Qarshida boshlangan. Bizning zamonimizgacha olimning ikki muhim asari yetib kelgan. Bulardan biri “Dastur ul-muluk” va ikkinchisi “Anis ul- fuqaro” (“Faqirlar do‘sti”) nomi bilan mashhur bo‘lib, 1735-yili yozilgan. Malihning so‘zlariga ko‘ra, “Dastur ul-muluk” Xoja Samandarning ilk yirik asari bo‘lishi mumkin Ushbu asar, muallifning so‘zlariga qaraganda, qandaydir yosh odamning iltimosi bilan yozilgan edi. Iltimos esa qandaydir nufuzli kishidan kelib chiqqan, zero muallif uning iltimosiga qarshi chiqa olmagan. Asar Subhonqulixonga bag‘ishlangan. U 1106/1694 – 95-yillarda tuzilgan bo‘lib, unda ushbu yillar voqealari haqidagi hikoyalar mavjud.

Xoja Samandar Muqammad ibn Baqo Termiziy o‘z zamonasida ma’naviyat dasturini targ‘ib etgan taniqli allomalaridan biri bo‘lgan. Zotan, uning taxallusi bo‘lgan Samandar tushunchasi ham uning ruhiyatiga monand ekanligidan dalolat beradi. Xoja Samandar Termiziy XVII asrning 30-yillarida tug‘ilib, XVIII asrning 30-yillarigacha yashab, 100 yildan ortiqroq umr ko‘rgan.

Sayohat yakunida tinglovchilar Xoja Samandar Termiziy hayoti va ilmiy faoliyati haqida o‘zlarini qiziqtirgan savollarga javoblar olishdi.